Түркістан облысында Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» жалпыұлттық экологиялық бағдарламасы аясында ауқымды жұмыстар жалғасуда. Бұл шара тек тазалық акциясы ғана емес, ол — қоғамда жаңа экологиялық мәдениет қалыптастырудың, «Адал азамат» тұжырымдамасын іс жүзінде асырудың маңызды құралы. Осы бағытта Сауран ауданында кезекті кең көлемді сенбілік өтіп, қоршаған ортаны қорғау және елді мекендердің санитарлық жағдайын жақсарту мақсатында үлкен іс атқарылды.
Экологиялық шараға аудан тұрғындары, жергілікті мекеме қызметкерлері мен қоғам белсенділері, сондай-ақ жастар мен еріктілер бір кісідей жұмылды. Бұл – «Халық үніне құлақ асатын мемлекет» қағидатының қоғамдық бастамалармен ұштасқан көрінісі. Азаматтардың мемлекеттік маңызы бар экологиялық жобаларға өз еркімен қатысуы — олардың туған жер тазалығына деген жауапты көзқарасын айғақтайды.
Сенбілік жұмыстары бірнеше негізгі бағыттарды қамтыды. Атап айтқанда, аудан үшін маңызды көлік дәліздері саналатын Шаға – Ескі Иқан және Түркістан – Шорнақ бағытындағы автомобиль жолдарының бойы қоқыстан толық тазартылды. Сонымен қатар, табиғатты аялау мақсатында Шорнақ елді мекеніндегі Тастақсай өзенінің жағалауына ерекше көңіл бөлінді. Өзен маңындағы бей-берекет тасталған тұрмыстық қалдықтар мен құрылыс қоқыстары жиналып, арнайы белгіленген полигондарға шығарылды.
Статистикалық мәліметтерге сүйенсек, игі іске жалпы саны 270 адам қатысып, 12 бірлік арнайы техника жұмылдырылды. Бірлескен жұмыстың нәтижесінде 21 тоннадан астам қоқыс шығарылып, өңірдің экологиялық келбеті жақсарды. Тазалық жұмыстарымен қатар, елді мекендерді абаттандыру шаралары да ұмыт қалмады: жол жиегіндегі 150-ге жуық ағаш әктеліп, тозығы жеткен қоршаулар ретке келтірілді.
«Әділетті Қазақстанды» құру — әрбір азаматтың өз ауласын, өз көшесін таза ұстауынан басталады. Саурандықтардың бұл белсенділігі — «Жауапты азамат» мәдениетінің өркен жайып келе жатқанын көрсетеді. Осындай жүйелі жұмыстар алдағы уақытта да тұрақты түрде жүргізіліп, тұрғындар арасында ақпараттық-түсіндіру шаралары жалғаса беретін болады. Ел тазалығы — баршамызға ортақ іс.