Сарыағаш ауданының әкімі Арман Абдуллаев аудан тұрғындарын жеке мәселелері бойынша қабылдап, олардың талап-тілектері мен ұсыныс-пікірлерін тыңдады. Мемлекет басшысы ұсынған «халық үніне құлақ асатын мемлекет» тұжырымдамасы аясында ұйымдастырылған бұл қабылдау жергілікті атқарушы билік пен тұрғындар арасындағы ашық әрі тиімді диалогтың нақты үлгісіне айналды.
Қабылдауға аудандық мәслихат депутаты Қ. Жүсіпов, аудан әкімінің орынбасарлары, дербес бөлім басшылары, сондай-ақ қала және ауылдық округ әкімдері қатысты. Бұл өз кезегінде көтерілген мәселелерді бір ғана деңгейде емес, салалық тұрғыда жан-жақты қарастырып, нақты шешімдер қабылдауға мүмкіндік берді. Әрбір өтініш назардан тыс қалмай, заң талаптары мен қолданыстағы нормативтік-құқықтық актілер аясында талқыланды.
Аудан әкімінің қабылдауына алдын ала жазылған 25 тұрғын жер қатынастары, тұрғын үй және құрылыс, әлеуметтік көмек, инфрақұрылым, жұмыспен қамту және өзге де жеке мәселелер бойынша өтініштерін жеткізді. Қабылдау барысында тұрғындар өздерін толғандырған түйткілдерді ашық айтып, кейбір мәселелерге қатысты нақты ұсыныстарын да білдірді.
Аудан әкімі Арман Абдуллаев әрбір тұрғынның мәселесін мұқият тыңдап, жекелеген өтініштер бойынша заңнама талаптарын түсіндірді. Сонымен қатар, көтерілген мәселелердің шешілу жолдарын нақтылап, тиісті сала басшылары мен ауылдық округ әкімдеріне арыз-шағымдарды белгіленген мерзімде, заң шеңберінде қарап, нәтижесін қамтамасыз ету жөнінде нақты тапсырмалар жүктеді. Бұл тапсырмалардың орындалуы жеке бақылауға алынатыны да атап өтілді.
Мұндай қабылдаулардың маңыздылығы – тұрғындардың билікке деген сенімін арттырумен қатар, жергілікті деңгейде туындайтын өзекті мәселелерді дер кезінде анықтап, алдын алуға мүмкіндік беруінде. Халықпен тікелей байланыс орнату арқылы әкімдік жұмысының ашықтығы мен жариялылығы қамтамасыз етіліп, басқарушылық шешімдердің сапасы арта түседі.
Айта кету керек, Сарыағаш ауданы әкімінің жеке қабылдауына жазылу Сарыағаш ауданы әкімі аппаратының жалпы және әкімшілік бөлімі арқылы жүзеге асырылады. Сондай-ақ тұрғындар egov.kz порталы, e-Otinish бірыңғай базасы арқылы немесе әкімдікке келіп, жазбаша өтініш қалдыру арқылы да тіркеле алады. Бұл – азаматтардың өтініш беру процесін жеңілдетіп, мемлекеттік қызметтердің қолжетімділігін арттыруға бағытталған нақты қадам.
Жалпы, мұндай жүйелі қабылдаулар жергілікті биліктің халыққа жақын екенін, әрбір тұрғынның мәселесі назарда екенін көрсетеді. Халықтың мұң-мұқтажына құлақ асып, оны шешуге нақты әрекет ететін мемлекет қағидаты дәл осындай ашық кездесулер мен нәтижелі диалог арқылы жүзеге асады.
