Түркістан облысында халықтың денсаулығын нығайту, медициналық қызметтің қолжетімділігі мен сапасын арттыру бағытында жүйелі жұмыстар жалғасуда. Әсіресе ауылдық елді мекендерде заманауи медициналық нысандарды ашу – тұрғындардың өмір сапасын жақсартуға бағытталған маңызды қадамдардың бірі. Осы орайда Сайрам ауданына қарасты Қарамұрт елді мекенінде «Азия Фаворит» медициналық орталығы пайдалануға берілді.
Жаңа медициналық орталықтың ашылуы ауыл тұрғындары үшін үлкен қуаныш болды. Себебі енді Қарамұрт және оған жақын орналасқан елді мекендердің халқы медициналық көмекті өз ауылында, уақыт оздырмай ала алады. Орталықта көрсетілетін қызметтер міндетті әлеуметтік медициналық сақтандыру жүйесі арқылы жүзеге асырылады, яғни тұрғындар бірқатар медициналық қызметтерді тегін алу мүмкіндігіне ие.
Медициналық орталықтың ашылу салтанатына Сайрам ауданының әкімі М.Мұхтарұлы қатысып, бұл жобаның әлеуметтік маңыздылығына ерекше тоқталды. Ол өз сөзінде мемлекет тарапынан халық денсаулығын сақтау, медициналық қызметтің қолжетімділігін арттыру бағытында тұрақты қолдау көрсетіліп келе жатқанын атап өтті. Сонымен қатар ауылдық жерлерде осындай нысандардың ашылуы тұрғындардың мемлекетке деген сенімін нығайтып, әлеуметтік тұрақтылықты қамтамасыз етуге ықпал ететінін жеткізді.
Аудан әкімі Мемлекет басшысының Жолдауларында денсаулық сақтау саласын дамыту, медициналық көмектің сапасын арттыру басты басымдықтардың бірі ретінде айқындалғанын атап өтіп, жаңа орталықтың халық игілігіне ұзақ жылдар бойы қызмет етуіне тілектестігін білдірді. Сондай-ақ медициналық ұжымға табыс тілеп, ауыл тұрғындарының алғысына бөлене беруін қалады.
Айта кету керек, медициналық орталықтың құрылысы 2025 жылдың маусым айында басталып, қараша айында толық аяқталған. Екі қабатты ғимараттың жалпы аумағы 480 шаршы метрді құрайды. Ғимарат заманауи талаптарға сай салынған және қажетті медициналық құрал-жабдықтармен қамтамасыз етілген.
Қазіргі таңда орталықта 17 маман тұрақты түрде қызмет атқарады. Оның ішінде 5 дәрігер мен 12 орта буын медицина қызметкері бар. Мұнда балалар дәрігері, жалпы тәжірибелі дәрігер, акушер-гинеколог, сондай-ақ ультрадыбыстық зерттеу жүргізетін маман қабылдау өткізеді. Бұл ауыл тұрғындары үшін аса қажетті медициналық қызмет түрлерін қамтиды.
Жаңа орталықтың іске қосылуы тұрғындардың аудан орталығына сабылуын азайтып, уақыт пен қаражатты үнемдеуге мүмкіндік береді. Бұрын қарапайым тексерулер үшін аудан орталығына баруға мәжбүр болған ауыл халқы енді қажетті кеңестер мен тексерулерді өз ауылында ала алады. Бұл әсіресе балалар, қарт адамдар және мүмкіндігі шектеулі азаматтар үшін өте маңызды.
Жалпы, Қарамұрт елді мекенінде медициналық орталықтың ашылуы ауылдық жерлердегі әлеуметтік инфрақұрылымды дамытудың нақты көрінісі болып отыр. Мұндай жобалар халықтың денсаулығын нығайтып қана қоймай, өңірдің әлеуметтік-экономикалық дамуына оң әсерін тигізеді. Алдағы уақытта да Сайрам ауданында тұрғындардың өмір сапасын арттыруға бағытталған осындай әлеуметтік маңызы бар бастамалар жалғасын таба бермек.