Бүгін Шымкент қаласындағы «Түркістан» сарайында Оңтүстік Қазақстан мемлекеттік педагогикалық университетінің 85 жылдық мерейтойына арналған салтанатты жиын өтті. Оңтүстік өңірінің білім қарашаңырағына айналған оқу ордасының мерейлі мерекесінде университет ректоры Гүлжан Сүгірбаева оқу ордасының өткені мен бүгінгі асулары жайлы баяндама оқыды. Оқу ордасының мерейлі белесімен сондай-ақ Шымкент қаласының әкімі Мұрат Әйтенов те құттықтады. Үздіктерді марапаттады. Әкім ізгі қасиеттерімен танылып, адал еңбегімен сапалы жұмыс нәтижесін көрсеткені» үшін ризашылығын білдіре отырып, профессорлар Наталья Дмитрюк, Ілесхан Сманов, оқытушылар Садық Болатбек, Дариха Бекманова, тәрбие қызметкері Гаухар Камаловаға «Шымкент қаласы әкімінің Алғыс хатымен» марапаттады. Мұнан соң құттықтаулар легін Қазақстан Республикасы Президенті кеңесшісі Мәлік Отарбаев пен Қазақстан Республикасы Ғылым және жоғары білім вице-министрі Қуаныш Ерғалиев жалғастырды.
Қ. Ерғалиев министр Саясат Нұрбектің құттықтау хатын жеткізді. Және Білім және ғылым саласында адал да абыройлы еңбегі үшін Ақлима Байғұтова, Ләззат Жорабекова, Данебек Пошаев, Галия Мадыбекова , Рода Кадирбаева, Райя Тажитаева, Нұрила Байсейтова, Гүлжамал Дүйсенова, Музафархан Темирхановқа «Ғылым және жоғары білім министрінің құрмет грамотасын табыстады. Салтанатты кеште шындық үшін күресіп, жалынды жырларымен ұлт рухын оятқан ақиық ақын Мұхтар Шахановқа ОҚМПУ-дың «Құрметті профессоры» атағы берілді. Сондай-ақ оқу ордасын әр жылдары басқарған Әбдімәлік Әшіров, Болысбек Өтелбаев, Оңалбек Жарылқасын, Оңалбай Аяшев сынды тұлғалар «Құрметті ректор» атағымен марапатталды.
Салтанатты жиын төрінде өнер сүйер қауымға оқу ордасының түлектері – республикалық байқаулардың лауреаты, ҚР Ерен еңбегі медалінің иегері, Түркия мемлекетінің әншісі, философы, композиторы, Ашық Вейсель атындағы медальдің иегері Ерлан Жандарбай мен ҚР мәдениет қайраткері, ҚР Ерен еңбегі медалінің иегері, ОҚМПУ доценті Үралхан Сейілбекова, эстрада жұлдызы, ҚР Еңбек сіңірген қайраткері Алтынай Жорабаева, Қуандық Рахым өнер көрсетті.