Халықты қолжетімді баспанамен қамту, тұрғын үй саясатын жүйелі түрде жүзеге асыру және әлеуметтік бағыттағы жобалардың тиімділігін арттыру мақсатында Ордабасы ауданында нақты жұмыстар атқарылуда. Осы бағыттағы маңызды жиындардың бірі Темірлан елді мекенінде өтті. Аудан әкімі Азат Оралбаевтың төрағалығымен өткен жұмыс жиынында кредиттік тұрғын үйлерді іске қосу және оларды сату тетіктері жан-жақты талқыланды.
Жиынға ауыл округтерінің әкімдері, аудандық тұрғын үй-коммуналдық шаруашылық бөлімі, білім бөлімі, орталық аурухана, ішкі саясат, құрылыс және сәулет бөлімдерінің басшылары, сондай-ақ «Отбасы банк» АҚ Түркістан облыстық филиалы директорының орынбасары қатысты.
Мәжілістің негізгі мақсаты – Темірлан елді мекенінде салынып жатқан тұрғын үйлерді халыққа тиімді әрі қолжетімді түрде ұсыну, кредиттік тұрғын үйлерді сату тетіктерін нақтылау және тұрғындар арасында түсіндіру жұмыстарын күшейту болды.
Жиын барысында жауапты бөлімдер тарапынан Темірлан аумағында жүргізіліп жатқан құрылыс жұмыстарының қазіргі жағдайы баяндалды. Атап айтқанда, «Батсу-Водоканал» ЖШС және «CK ABU GROUP» ЖШС тарапынан салынудағы екі қабатты тұрғын үйлердің құрылысы жоспарға сәйкес жүргізіліп жатқаны айтылды. Қазіргі таңда Темірлан елді мекеніндегі 70 гектар алқапта 32 пәтерлік екі қабатты үйлер мен 120 пәтерлік тұрғын үй блоктарының құрылысы қарқынды жүріп жатыр.
Құрылыс нысандарында ішкі әрлеу жұмыстары, электр желілерін тарту, ауыз су жүйесін жүргізу, сондай-ақ фасадтарды абаттандыру жұмыстары белсенді түрде атқарылуда. Бүгінде құрылыс алаңында 160-қа жуық жұмысшы мен 4 арнайы техника жұмылдырылған. Бұл өз кезегінде жобаның уақытылы әрі сапалы аяқталуына мүмкіндік беріп отыр.
Жиын барысында «Отбасы банк» өкілі жиналғандарға кредиттік тұрғын үйді сатып алу шарттары мен қолданыстағы мемлекеттік бағдарламалар туралы кеңінен түсіндірді. Тұрғын үйлерді сату кезінде әлеуметтік әділдік қағидаты сақталатыны, бірінші кезекте тұрғын үй кезегінде тұрған азаматтарға және әлеуметтік осал санаттағы тұрғындарға басымдық берілетіні айтылды.
Атап айтқанда, кредиттік тұрғын үйлерді сатып алу құқығы тұрғын үй кезегінде тұрған азаматтарға және Түркістан облысының кез келген тұрғынына қолжетімді. Ал бірінші кезекте Ұлы Отан соғысының ардагерлері, жетім балалар, көпбалалы аналар мен отбасылар, бірінші және екінші топтағы мүгедектер, мүгедек баласы бар отбасылар, жеңілдігі бар ардагерлер мен жесірлер қамтылады.
Түсіндіру барысында несиелеудің 2–10–20 және 5–10–20 бағдарламаларының шарттары егжей-тегжейлі айтылды. Бұл бағдарламалар бойынша пайыздық мөлшерлемелердің төмендігі, бастапқы жарнаның қолжетімділігі және несиелеу мерзімінің ұзақтығы тұрғындар үшін тиімді мүмкіндік екені атап өтілді. Сонымен қатар табыс деңгейіне қойылатын талаптар, пәтердің ауданы мен сапасына қатысты шарттар да нақты түсіндірілді.
Жиында тұрғын үйлердің жалпы сипаттамасына да тоқталынды. Темірлан елді мекенінде салынып жатқан жаңа тұрғын үйлер екі қабатты болып, бір, екі және үш бөлмелі пәтерлерден тұрады. Пәтерлердің ауданы 34 шаршы метрден 87 шаршы метрге дейінгі аралықты қамтиды. Бір шаршы метрдің бағасы белгіленген тәртіпке сәйкес есептеліп, кредиттік сату құны халыққа барынша қолжетімді деңгейде ұсынылады.
Жиын қорытындысында аудан әкімі Азат Оралбаев ауыл округ әкімдеріне және жауапты бөлім басшыларына бірқатар нақты тапсырмалар берді. Атап айтқанда, тұрғындар арасында кредиттік тұрғын үй бағдарламалары бойынша түсіндіру жұмыстарын күшейту, тұрғын үй кезегінде тұрған азаматтардың мәліметтерін нақтылау, құрылыс барысын тұрақты бақылауда ұстау міндеттелді. Сонымен қатар әрбір тұрғынның сұрағына нақты әрі ашық жауап беру арқылы сенімді арттыру қажеттігі айтылды.
Аудан басшысы Темірлан елді мекенінде тұрғын үйлер салу және оларды халыққа қолжетімді түрде ұсыну бағытындағы жұмыстар алдағы уақытта да жүйелі түрде жалғасатынын жеткізді. Бұл жобалар тұрғындардың тұрмыс сапасын арттырып қана қоймай, елді мекеннің әлеуметтік-экономикалық дамуына серпін беретін маңызды қадам екені атап өтілді.
Жиын соңында жауапты сала өкілдері мен банк мамандары тұрғын үйді сатып алу механизмі бойынша кезең-кезеңімен түсіндіріп, азаматтардың сұрақтарына жауап берді. Осылайша, Темірлан елді мекеніндегі кредиттік тұрғын үйлерді сату тетіктерін талқылауға арналған жиын халық үшін маңызды әрі нақты ақпарат берілген мазмұнды алаңға айналды.