Ордабасы ауданында мемлекет жүргізіп отырған экономикалық және басқарушылық реформаларды жүзеге асыруға ерекше назар аударылып келеді. Аудан деңгейінде халықтың тұрмыс сапасын арттыру, кәсіпкерлікті дамыту, экономиканы әртараптандыру, инвестиция тарту бағытында жүйелі жұмыстар жүргізілуде. Бұл шаралар елдік деңгейде белгіленген стратегиялық міндеттермен толық үйлеседі. Мемлекет басшысы Қасым-Жомарт Тоқаев атап өткендей, қазіргі кезеңде елдің экономикалық тұрақтылығы мен әлеуметтік әл-ауқатын арттыру – мемлекеттік саясаттың басым бағыты.
Президент өз сөзінде қазіргі шақта қабылданып жатқан шешімдер ел үшін аса маңызды екенін айтты. «Бүгінгі жиында ауыл әкімдерімен қатар, Үкімет мүшелері және облыс әкімдері отыр. Өздеріңіз білесіздер, мен Үкіметке экономиканы сауықтыру үшін Ұлттық банкпен, Қаржы нарығын реттеу және дамыту агенттігімен бірлесіп, нақты шаралар қабылдауды тапсырдым», – деді Мемлекет басшысы.
Осы тапсырма негізінде Үкімет пен қаржы институттары Макроэкономикалық тұрақтандыру және халықтың әл-ауқатын арттыру жөніндегі үш жылдық бірлескен іс-қимыл бағдарламасын қабылдады. Бұл құжат еліміздің экономикалық дамуына жаңа дем беріп, әлеуметтік тұрақтылықты қамтамасыз етуге бағытталған. Президент бағдарламаның барлық тармақтары сапалы әрі уақтылы орындалуы тиіс екенін атап, облыс әкімдеріне бұл жұмысты бақылауда ұстауды тапсырды. Ордабасы ауданы да осы бағыттағы міндеттерді орындауға белсенді атсалысып келеді.
Мемлекет басшысы ел алдында тұрған негізгі мақсаттарды да айқындап берді. Атап айтқанда, экономиканың тұрақты және сапалы өсімін қамтамасыз ету, инфляцияны төмендету, халықтың табысын арттыру, шағын және орта бизнесті қолдау, өндірісті жандандыру, дайын өнім экспортын ұлғайту – бүгінгі күннің басты міндеттері. Бұл бағыттың әрқайсысы Ордабасы ауданында өзекті: кәсіпкерлерге қолайлы жағдай жасау, ауыл шаруашылығы өнімдерін қайта өңдеу үлесін арттыру, жаңа өндіріс орындарын ашу бойынша жұмыстар тұрақты түрде жүргізіліп келеді.
Президент халықаралық жағдайға да тоқталып өтті: «Қазіргі таңда әлемдегі ахуал тұрақты емес, келешегі бұлыңғыр деуге болады. Кейбір елдердің егемендігі, жерінің тұтастығы әлі толық шешілмеген… Біріккен Ұлттар Ұйымының беделі әлсіреп кетті, жаһандық экономика да құбылмалы күйде», – деді ол. Мұндай жағдайда елдің ішкі тұрақтылығы мен бірлігі ерекше маңызға ие. Осыған орай Мемлекет басшысы барша қоғамды сергек болуға, елдің тыныштығы мен игілігі үшін жұмылуға шақырды.
«Сондықтан бәріміз бір ұлт болып, қырағылықты сақтауымыз керек, жас ұрпаққа қамқорлық көрсетіп, дұрыс тәрбие беруіміз қажет, ішкі даулардан аулақ болып, ынтымақ-бірлігімізді нығайтуымыз керек», – деді Президент. Ордабасы ауданында да қоғамдық келісім мен қоғамдық қауіпсіздікті сақтау, жастармен жұмыс, жауапты азаматтық мәдениетті қалыптастыру бағытында нақты жобалар іске асуда.
Сонымен бірге, Мемлекет басшысы елдің ең үлкен құндылығы — тәуелсіздік екенін ерекше атап көрсетті:
«Қазақстанның егемендігі, дербестігі, тәуелсіздігі – бәрінен қымбат. Бұл – ұлтымыздың алдында тұрған ең биік мақсат. Мен ел Президенті ретінде бұл мақсатты орындау үшін барлық күш-жігерімді саламын», – деді ол.
Бүгінде Ордабасы ауданында мемлекеттік бағдарламалар мен реформалардың орындалуын қамтамасыз ету, әлеуметтік-экономикалық көрсеткіштерді жақсарту, тұрғындармен кері байланыс орнату, «Халық үніне құлақ асатын мемлекет» қағидатын іс жүзінде жүзеге асыру бағытында жүйелі жұмыс жүріп жатыр.
Мемлекет басшысы сөзін елдің амандығы мен бірлігін тілеумен аяқтады:
«Еліміз аман, жұртымыз тыныш болсын! Баршаңызға амандық, табыс тілеймін!»
Ордабасы ауданы елдік реформаларды іске асыруда белсенділік танытып, Әділетті Қазақстан құру жолындағы ортақ іске өз үлесін қоса береді.