Ордабасы ауданының орталығы Темірлан ауылында «Интеллектуалды ұлт» жобасы аясында ұйымдастырылатын «Зияткер ұрпақ – ұлт мақтанышы» атты дәстүрлі шахмат турнирінің VI маусымы өтті. Жыл сайын тұрақты түрде ұйымдастырылатын бұл сайыс ауданның интеллектуалды әлеуетін арттыруға бағытталған маңызды шаралардың біріне айналып отыр.
Турнирдің ашылу рәсіміне Ордабасы ауданының әкімі Азат Оралбаев қатысты. Аудан басшысы қатысушыларға сәттілік тілеп, интеллектуалды спортты дамыту жолында еңбек етіп жүрген жаттықтырушылар мен ұйымдастырушыларға алғысын білдірді.
«Шахмат – жас ұрпақтың ойлау қабілетін дамытатын, стратегиялық шешім қабылдауға үйрететін ерекше интеллектуалды спорт түрі. Бұл турнир – балалардың болашағына жасалған үлкен қадам. Интеллектуалды ұлт қалыптастыруда мұндай бастамалардың маңызы зор», – деді әкім сөзінде.
Аталған жоба аудан жастарының білімге, ғылымға және интеллектуалды ортаға деген қызығушылығын арттыруға серпін беріп келеді. Бүгінгі турнир – соның айқын дәлелі.
Ордабасы ауданында шахматты дамыту жұмыстары жүйелі түрде жүргізіліп келеді. 2020 жылы басталған бастама 2021 жылы арнайы аудандық «Шахмат» үйірмесінің ашылуына жол ашты. Бүгінде онда түрлі жастағы оқушылар теориялық және практикалық дайындықтарды меңгеруде.
Мектептерде шахмат үйірмелерінің көбеюі балалардың логикалық ойлау қабілетін жетілдіруге, жаңа дағдыларды игеруіне және шығармашылық әлеуетін ашуға ықпал етуде. Ата-аналардың да бұл бастамаға қолдауы артып отыр.
Шахмат – тек спорт емес, баланың ой-өрісін кеңейтетін, аналитикалық ойлау мен сабырлылықты қалыптастыратын ерекше құрал. Ордабасыда жүзеге асырылып жатқан жобалар осы бағыттағы жұмыстардың тиімділігін көрсетіп отыр.
Шара барысында «Intellectualdy ult» жалпыұлттық жобасының авторы, «Шахмат әліппесі» кітабының құрастырушысы Балтабек Түйетаев қатысушыларға турнирдің өткізілу ережесін түсіндірді.
Ол өз сөзінде аудан басшылығы мен ұйымдастырушыларға қолдау көрсеткені үшін алғыс білдіріп:
«Ордабасыда интеллектуалды жоба жүйелі түрде жүзеге асырылып келеді. Бұл – болашаққа жасалған үлкен инвестиция. Балалардың шахматқа қызығушылығы артып, нәтиже көрсетіп жүргендері қуантады», – деді.
Дәстүрлі сайысқа ауданның барлық білім беру мекемелерінен келген оқушылар, жасөспірімдер және ересек тұрғындар қатысты. Турнир екі санат: ересектер және жасөспірімдер бойынша ұйымдастырылып, әр қатысушы өз шеберлігін көрсетуге мүмкіндік алды.
Турнир барысында балалардың ойындағы батыл шешімдері, күрделі комбинацияларды қолдануы және ойынға деген ынтасы ерекше байқалды. Ата-аналар мен ұстаздар қатысушыларға қолдау білдіріп, шахмат залында мерекелік атмосфера қалыптасты.
«Зияткер ұрпақ – ұлт мақтанышы» жобасы Ордабасы ауданында зияткерлік спортты дамытудың тың серпініне айналды. Жыл сайын қатысушылар санының артуы – тұрғындардың интеллектуалды жобаларға қызығушылығының жоғары екенін көрсетеді.
Шахмат – жастарды тәртіпке, сабырға, ойлануға және жауапкершілікке баулитын интеллектуалды спорт. Сондықтан аудан әкімдігі алдағы уақытта да бұл бағыттағы шараларды қолдап, ауыл мектептерінде үйірмелерді кеңейтуді жалғастырмақ.
Темірлан ауылында өткен дәстүрлі шахмат турнирі ауданның зияткерлік ортасын дамытуға қосылған маңызды үлес болды. Жарысқа қатысқан жастардың жігері, ересектердің қолдауы және жобаның жүйелі түрде жүзеге асырылуы – Ордабасы ауданының интеллектуалды әлеуетінің артып келе жатқанын дәлелдейді.
Интеллектуалды ұлт қалыптастыру жолындағы бастамалар жалғасын таба бермек.