Түркістан облысы Ордабасы ауданының білім бөлімінің «Болашақ» жалпы білім беру мектебі – Келешек мектебі форматындағы жаңа деңгейдегі білім ордасында 2025 жылғы 28 қараша күні облыстық деңгейде «Адал азамат» біртұтас тәрбие бағдарламасы аясында «Құндылыққа негізделген тәрбие беру жолдары» тақырыбында тәжірибелік семинар ұйымдастырылды. Семинардың басты мақсаты – білім алушылардың бойына ұлттық және адамгершілік құндылықтарды сіңіріп, тәрбие мен оқыту процесіне тиімді енгізу жолдарын тәжірибе жүзінде көрсету, сондай-ақ педагогтердің озық тәжірибесін тарату болды.
Семинарды Түркістан облысының білім басқармасы «Білім беруді дамыту орталығының» тәрбие және әлеуметтік педагогика бөлімінің меңгерушісі Ш.Примбетова ашып, қатысушыларға сәттілік тіледі. Сондай-ақ, аудандық білім бөлімінің әдіскері Ұ.Мұратбек және аудандық ата-аналар комитетінің төрайымы Ш.Азимбаева семинарға қатысушыларға құттықтау сөзін айтып, шараның маңыздылығын атап өтті.
Семинарға Түркістан облысының барлық аудандарынан білім бөлімдерінің тәрбие жұмысы жөніндегі әдіскерлері мен директордың тәрбие жұмысы жөніндегі орынбасарлары қатысты. «Адал азамат» бағдарламасының «Жарқын болашақ кепілі» айдары аясында өткізілген семинар барысында қатысушыларға құндылыққа негізделген тәрбие беру жолдары көрсетілді. Семинарда келесі бағыттар бойынша тәжірибелік үлгілер ұсынылды:
- Күн сайын және апта сайын орындалатын «Құндылықтар әлемі» іс-шаралары.
- Құндылыққа бағытталған жобалар, оқушылардың жан-жақты дамуына мүмкіндік беретін шығармашылық жұмыстар.
Семинар барысында «Қазақстан Педагогикалық академиясы» Корпоративтік қорының академиялық профессоры Тамара Махалқызы «Құндылыққа негізделген тәрбие беру жолдары» тақырыбында баяндама жасап, семинардың мазмұнын ашты. Баяндамада құндылыққа негізделген білім беру мен тәрбие беру әдістері, сабақтарда ұлттық және адамгершілік құндылықтарды кіріктіру жолдары қарастырылды.
Семинар барысында әр пән бойынша – ағылшын, математика, физика, биология, тарих, география, қазақ әдебиеті – сабақ үлгілері көрсетіліп, тәрбие жұмысына құндылықтарды енгізу тәжірибесі талқыланды. Педагогтер әр сабақта оқушылардың шығармашылық қабілеттерін дамыту, сыни ойлау мен жауапкершілікті қалыптастыру әдістерін көрсетті.
Аудандық әдіскерлер, тәрбие орынбасарлары, пән мұғалімдері, сынып жетекшілері, кітапханашылар мен психологтар сабақ үлгілерін түрлі форматта көрсете отырып, тәжірибе алмасу алаңын қалыптастырды. Бір мектеп базасында бірнеше мектептің озық тәжірибесі көрнекі түрде көрсетіліп, қатысушылар сабақ үлгілерін өз мектептерінде қолдану бойынша нақты ұсыныстар алды.
Семинар жоғары деңгейде ұйымдастырылып, өз мақсатына толық жетті. Қатысушылар құндылыққа негізделген тәрбие беру тәжірибесін меңгеріп, мектептегі тәрбие жұмысын жетілдіру жолдарын үйренді. Іс-шара нәтижесінде педагогтер оқушыларды адамгершілік, адалдық, патриоттық және әлеуметтік жауапкершілікке тәрбиелеуде жаңа тәсілдерді қолдануға ынталандырылды.
Семинардың қорытындысында қатысушылар өз алған тәжірибелерімен бөлісіп, мектептегі тәрбие жұмысының тиімділігін арттыру, құндылыққа негізделген жобаларды жүйелі түрде іске асыру жолдарын талқылады. Осылайша, «Адал азамат» біртұтас тәрбие бағдарламасы аясында ұйымдастырылған тәжірибелік семинар білім беру саласында озық тәжірибені насихаттау, педагогтердің кәсіби шеберлігін арттыру және оқушылардың құндылықтық санасын қалыптастыруда маңызды қадам болды.