Ордабасы ауданында аудан әкімі Азат Оралбаев пен шетелдік «LEO MASTER» жауапкершілігі шектеулі серіктестігі арасында аудан аумағына электрологиялық қорғау құрылғылары мен дизельді генераторлар өндіретін өндірістік желіні орналастыру жөніндегі меморандумға қол қойылды. Бұл ауқымды бастама өңірде жаңа өндірістік алаңның ашылуына, электр энергиясын тұрақтандыруға бағытталған жоғары технологиялық жабдықтарды шығаруға және сервистік орталықтың құрылуына жол ашады.
Меморандум аясында аудан экономикасына жаңа серпін беру, жергілікті кәсіпкерлікті дамыту және өндірістік әлеуетті арттыру көзделуде. Жоба бойынша автоматты ажыратқыштар, дифференциалды қорғау құрылғылары (УЗО, дифавтоматтар), кернеу релелері, кернеу тұрақсыздығынан қорғайтын модульдік жабдықтар, жарық индикаторлары және басқару модульдері сияқты электрологиялық құрылғылар құрастырылады. Осы өнімдер облыс пен республика көлеміндегі мектептерді, ауруханаларды, кәсіпорындарды, әкімшілік ғимараттарды және жеке тұрғын үйлерді электр қауіпсіздігімен қамтамасыз етуге мүмкіндік береді.
Жоба шеңберінде қуаты 30–1200 кВт аралығындағы дизельді генераторлар өндірілетін болады. Олар шағын нысандарға арналған 30–60 кВт генераторлардан бастап, орта бизнеске арналған 100–300 кВт генераторлар және ірі өндіріс орындары мен инфрақұрылымдық нысандарға арналған 500–1200 кВт генераторларды қамтиды. Бұл құрылғылар апатты жағдайларда электр энергиясын үздіксіз жеткізуді қамтамасыз ететін жоғары сенімді жабдық болып саналады.
Сонымен қатар, жобаның маңызды бөлігі – аудан аумағында сервистік және техникалық қолдау орталығының құрылуы. Бұл орталық жабдықтарды монтаждау, диагностика жасау, жөндеу, шұғыл сервистік қызмет көрсету, сондай-ақ кепілдік және кепілдіктен кейінгі техникалық қолдау көрсетуді жүзеге асырады. Мұндай сервистік инфрақұрылым ауданның энергетикалық қауіпсіздігін едәуір арттыруға, инфрақұрылымдық нысандардың электрмен үздіксіз жабдықталуын қамтамасыз етуге мүмкіндік береді.
Жоспарланып отырған инвестиция көлемі 750 млн теңгені құрайды. Жобаның іске асуы 2025 жылғы желтоқсан мен 2026 жылғы қаңтар аралығында кезең-кезеңімен жүзеге асады. Өндіріс нәтижесінде 20-дан астам жаңа жұмыс орны ашылады. Өндірістік база арнайы станоктармен, электр сынақ стендтерімен және монтаж алаңдарымен қамтамасыз етіледі.
Аудан әкімі Азат Оралбаев жобаның маңыздылығын атап, оның тек экономикалық тұрғыдан ғана емес, сонымен қатар энергетикалық қауіпсіздік, инфрақұрылымдық тұрақтылық және жергілікті мамандарды жұмыспен қамту сияқты әлеуметтік мәні бар екенін айтты. Сонымен қатар, жоба аудан бюджетінің кірісін арттыруға және Ордабасы аумағында өндірістік-индустриялық әлеуетті арттыруға зор үлес қосатынын жеткізді.
Жаңа өндірістік желі іске қосылғаннан кейін электр құрылғылары мен генераторлар облыс пен республика көлеміндегі барлық әлеуметтік және өндірістік нысандарға жеткізіледі. Бұл өз кезегінде энергетикалық инфрақұрылымның сенімділігін арттырып, апатты жағдайлардағы тәуекелдерді төмендетеді.
Жобаның жүзеге асуы жергілікті өндірісті дамытуға, жоғары технологиялық өнімдерді шығаруға, инженерлік және техникалық қызметкерлердің кәсіби деңгейін арттыруға мүмкіндік береді. Сонымен қатар, сервистік орталық аудан тұрғындарына заманауи құрал-жабдықтарды пайдалану мен қызмет көрсетуді қамтамасыз ететін болады.
Ордабасы ауданында жүзеге асырылатын бұл өндірістік жоба өңірдің әлеуметтік-экономикалық дамуына тың серпін беріп, жаңа өндірістік алаңдардың құрылуына, жергілікті мамандардың жұмысқа тартылуына, аудан бюджетінің кірісін арттыруға және инфрақұрылымдық нысандардың электрмен үздіксіз жабдықталуына мүмкіндік жасайды.
Аудан әкімдігі алдағы уақытта да өңірдегі өнеркәсіптік жобаларды қолдап, инновациялық өндірістерді дамытуға, жаңа инвестициялар тартуға, сондай-ақ жергілікті тұрғындарды жұмыспен қамтуға бағытталған жұмыстарды жүйелі түрде жүзеге асыруды жоспарлап отыр.