Қазіргі таңда жастарды зиянды әдеттерден алшақтатып, олардың бойында денсаулыққа деген жауапкершілікті арттыру, рухани дамыған тұлға қалыптастыру – қоғамның маңызды міндеттерінің бірі. Осы бағытта «Нашақорлықсыз қоғам – рухани дамыған ұлт!» ұранымен бүгін ауданымызда спорттық жарыс ұйымдастырылды. Шараға жасөспірімдер, мектеп командалары, ұстаздар мен спортқа қызығушы тұрғындар қатысып, салауатты өмір салтын насихаттауға өз үлестерін қосты.
Іс-шараның басты мақсаты – жастарды спортқа тарту арқылы олардың бойында бірлік, тәртіп, рухани тазалық, өз-өзіне сенімділік және денсаулықтың құндылығын сезіндіру. Ұйымдастырушылардың айтуынша, мұндай жарыстар жастар арасында нашақорлықтың алдын алудың ең тиімді жолдарының бірі саналады. Өйткені спортпен айналысатын жас буынның өмірлік құндылықтары айқын қалыптасып, зиянды әрекеттерден аулақ болуға бейім келеді.
Жарыс төрт түрлі спорттық бағыт бойынша өтті:
• Қол күрес,
• Арқан тарту,
• Эстафеталық командалық жарыс,
• 100 метр қашықтыққа жүгіру.
Әр сайыс түрінде командалар өз күшін сынап, шеберліктерін көрсетіп, жоғары нәтижеге қол жеткізуге тырысты. Жарыс барысында әсіресе командалық рух, достық пен өзара қолдау ерекше байқалды. Жас спортшылардың белсенділігі, жеңіске деген жігері мен алға ұмтылысы көрермендердің де көңілінен шықты.
Спорттық дода аймақтық іріктеу кезеңі ретінде өткізіліп, жүлделі орынға талас жоғары деңгейде ұйымдастырылды. Әділ бағалау нәтижесінде Жамбыл атындағы жалпы орта мектебінің командасы өз бағы мен бабын танытып, аудандық кезеңге жолдама алды. Жас спортшылардың бұл жетістігі мектеп ұжымы мен ата-аналары үшін үлкен қуаныш болды.
Жарысқа қатысқан барлық командалар жоғары белсенділік көрсетіп, өздерінің дайындық деңгейін, ынта-жігерін дәлелдеді. Ұйымдастырушылар олардың әрқайсысына алғыс білдіріп, спорттың адам өміріндегі денсаулық, тәрбие және рухани дамудағы рөлін ерекше атап өтті.
Шара барысында қатысушыларға дұрыс өмір салтын ұстану, зиянды әдеттерден аулақ болу, спорттың денені ғана емес, ойды да шынықтыратыны туралы түсіндірме жұмыстары жүргізілді. Жастар арасындағы нашақорлықтың алдын алу бағытында ақпараттық жадынамалар таратылып, мамандар кеңесін берді.
Осындай іс-шаралар жастарды өз болашағына жауапкершілікпен қарауға, қоғамның дамуына үлес қоса алатын дені сау, рухани бай тұлға болып қалыптасуына ықпал етеді. «Нашақорлықсыз қоғам – рухани дамыған ұлт!» деген ұстаным әрбір жастың өмірлік қағидасына айналса, қоғам да, ел болашағы да жарқын болмақ.