2025 жылғы 16–20 маусым аралығында Шымкент қаласының әкімі Ғабит Сыздықбеков тұрғындармен көшпелі кездесулер ұйымдастырып, олардың ұсыныс-тілектерін тыңдады. Бұл кездесулер барысында жер қатынастары басқармасына нақты тапсырмалар беріліп, аталған тапсырмаларды орындау бойынша жүйелі жұмыстар жүргізілді. Қала басшысы тұрғындармен ашық диалогты нығайту және жер қорын тиімді пайдалану мәселелерін шешу маңызды екенін атап көрсетті.
Жер қатынастары басқармасының басты міндеті – тұрғындардан түскен өтініштер мен мәселелерді жан-жақты зерттеп, заң шеңберінде шешім қабылдау болды. Бұл үдерісте тұрғындармен кері байланыс орнатылып, қажетті жағдайларда актілер толтырылып, құзырлы органдарға хаттар жолданды.
Атап айтқанда, мемлекет қажеттілігі үшін алынатын жер учаскелеріне қатысты меншік иелерімен түсіндіру жұмыстары жүргізілді. Жерге орналастыру жобасына енгізілетін өзгерістер бойынша тұрғындардан ұсыныстар қабылданып, олар зерделенді. Бұл — жердің заңсыз пайдалануына жол бермеу және тиісті заң талаптарын сақтауды қамтамасыз ету бағытындағы маңызды қадам.
Сонымен қатар, Добролюбова көшесінде заңсыз орнатылған теңіз контейнерлері анықталып, оларды жою немесе заңдастыру мақсатында құзырлы органдарға хат жолданды. Мұндай шаралар қаланың көркі мен санитарлық жағдайын жақсартуға ықпал етеді.
«Жасыл Жай» көшесіндегі игерілмеген жер телімдері де мұқият зерттеліп, олардың тиімді пайдаланылуын қамтамасыз ету бойынша ұсыныстар берілді. Бұл жерлердің бос қалмауы, әрі қаланың инфрақұрылымдық дамуына қосқан үлесі үлкен.
Қайтпас шағынауданындағы мазарат маңындағы жер учаскелеріне қатысты тұрғындарға түсіндірме жұмыстары жүргізіліп, жер пайдаланудың заңдылығы мен тиімділігі туралы ақпарат берілді. Сондай-ақ Т.Орынбаев және Ә.Жангелдин көшелері бойындағы жер учаскелеріне зерттеу жүргізіліп, олардың заңдылығын тексеру мақсатында құзырлы органдарға тиісті хаттар жолданды.
Қала әкімдігі тұрғындардың әрбір ұсынысы мен өтінішін мұқият қарап, заң аясында шешуге баса мән береді. Алдағы уақытта да ашық диалог жалғаса беріп, тұрғындардың көтерген мәселелері кезең-кезеңімен шешілетін болады. Бұл – жер қорын тиімді пайдалану және қала инфрақұрылымын жақсарту бағытындағы маңызды серпіліс.