Шымкент қаласының әкімі Ғабит Сыздықбековтің Тұран ауданы тұрғындармен көшпелі кездесуінде көшелерге асфальт төсеу мен жарықшамдар орнату мәселесі көтерілді. Жергілікті халықтың өтінішіне бейжай қарамаған қала әкімі дереу тиісті мекемелерге нақты тапсырма берді. Нәтижесінде қысқа мерзім ішінде Тұран ауданы, Жаңаталап тұрғын алабы аумағындағы Бейбітшілік көшесіне жарық шамдар толық орнатылып, іске қосылды.
Бұдан бөлек, қазір асфальт жабындысының екінші қабатын төсеу жұмысы жүргізіліп жатыр. Бұл – жол сапасын арттырып, тұрғындар үшін қолайлы әрі қауіпсіз ортаны қалыптастырудың нақты көрінісі.
Өзгерістерге куә болған тұрғындар атқарылып жатқан жұмысқа дән риза екенін жеткізіп, алғыстарын білдіріп жатыр.
Айта кететін, Жаңаталап тұрғын алабы Шымкенттің батыс бөлігінде, қаланың жаңа аудандарының біріне – Тұран ауданына қарайды. Ауылдық сипатта дамығанымен, бүгінде бұл аймақта тұрғын үйлер көптеп салынып, жаңа көшелер ашылып, қалаға тән инфрақұрылым енгізілуде. Халықтың басым бөлігі – жергілікті тұрғындар мен қала маңынан қоныс аударған отбасылар.
Соңғы жылдары Жаңаталапта бірқатар инфрақұрылымдық жобалар жүзеге асырылуда:
— Ішкі жолдар жөнделіп, асфальттау жұмыстары жүргізіліп жатыр;
— Электр, су және табиғи газ жүйелері біртіндеп тартылуда;
— Мектептер мен балабақшаларға сұраныс артқан сайын жаңа білім беру мекемелерін салу жоспарда бар;
— Жол бойында қоғамдық көлік желісі дамып, қала орталығына қатынау жеңілдеді.
Тұран ауданының даму жоспарларына сәйкес, Жаңаталап тұрғын алабында алдағы уақытта:
— Жаңа әлеуметтік нысандар (емхана, мәдениет үйі, спорт кешені) салу,
— Инженерлік инфрақұрылымды толық жаңғырту,
— Экологияны сақтау мақсатында жасыл белдеулер мен саябақтар салу көзделіп отыр.
Жаңаталап – Шымкенттің жаңаша тыныс алып, қалаға етене жақындап келе жатқан аумақтарының бірі. Бұл тұрғын алапта өмір сүру қолайлы болып, халық үшін заманауи жағдайлар жасалып келеді. Алдағы жылдары бұл өңірдің толыққанды қала бөлігіне айналары анық.
