Ордабасы ауданында өскелең ұрпақтың рухани қауіпсіздігін қамтамасыз ету, діни сауаттылық деңгейін арттыру және ұлттық құндылықтарды дәріптеу бағытындағы ақпараттық-түсіндіру жұмыстары тұрақты түрде жалғасып келеді. Осы мақсатта Қажымұхан ауыл округінде орналасқан Ғ.Мұратбаев атындағы жалпы білім беретін мектептің жоғары сынып оқушыларымен мазмұнды кездесу ұйымдастырылды. Іс-шара Қазақстан Республикасында діни экстремизм мен терроризмге қарсы іс-қимыл жөніндегі 2024–2028 жылдарға арналған мемлекеттік бағдарлама аясында өтті.
Кездесудің негізгі мақсаты – жастардың діни сауаттылығын арттыру, радикалды идеологиялардың ықпалынан сақтандыру, қоғамда жауапкершілік пен рухани иммунитетті күшейту. Бұл – тек білім беру саласының ғана емес, ел болашағына алаңдайтын барлық азаматтардың ортақ міндеті.
Іс-шараға Ақпараттық-түсіндіру тобының (АТТ) мүшелері: Қажымұхан ауыл округінің әкімі Б. Нұрпейісов, ауданның бас имамы Р. Жұмаділлаев және ауылдық ардагерлер кеңесінің төрағасы Қ. Оңалбек қатысып, жас буынға мазмұнды ойларын жеткізді.
Округ әкімі Б. Нұрпейісов өз сөзінде жастардың ұлттық болмысын сақтау, олардың қоғамдағы өзгерістерге бейімделу қабілетін арттыру қажеттігін айтты. Ол бүгінгі таңда ақпараттың қолжетімділігі мен әлеуметтік желілердің ықпалы артқан сайын әрбір жас үшін дұрыс ақпаратты саралай білу – аса маңызды дағды екенін атап өтті.
Ал ауданның бас имамы Р. Жұмаділлаев ислам дінінің шынайы мәні, оның адамгершілікке, мейірімділікке, бірлікке үндейтін қағидаттары туралы кең көлемді түсіндіру жасады. Ол экстремистік идеологияның белгілерін, жастарды арбау тәсілдерін, дәстүрлі ислам мен радикалдық ағымдардың айырмашылығын түсіндіріп, діни ақпаратты тек ресми дереккөздерден алу керектігін нақты мысалдармен жеткізді. Оның сөзінше, діни сауатсыздық – теріс ағымдардың басты қаруы.
Кездесудің тағы бір маңызды спикері – Қажымұхан ауылдық ардагерлер кеңесінің төрағасы Қ. Оңалбек жастармен өзінің өмірлік тәжірибесімен бөлісіп, бірлік, жауапкершілік, отансүйгіштік сияқты құндылықтардың маңызын атап өтті. Ол қазақ халқының салт-дәстүрлері, үлкенге құрмет, ұрпақ сабақтастығы секілді ұлттық тәрбиенің негізгі қағидалары заман ағымына қарамастан, әрдайым өзекті болып қала беретінін айтты.
Жиын барысында оқушыларға діни экстремизмнің қоғамға тигізетін зияны, оның отбасылық құндылықтарға, жеке тұлғаның дамуына, ел бірлігіне келтіретін қауіптері жан-жақты түсіндірілді. Спикерлер теріс ағымдардың жастарды қалай алдауға тырысатынын, қандай әлеуметтік-психологиялық әдістер қолданатынын талдап көрсетті. Сонымен қатар, оқушыларға күмәнді сайттар мен топтардан сақ болу, қандай жағдайда кімге жүгіну керектігі жөнінде нақты кеңестер берілді.
Кездесу еркін пікір алмасу, сұрақ-жауап форматында өтті. Оқушылар өздерін толғандырған мәселелерді ашық қойып, мамандардан толыққанды жауап алды. Бұл – олардың діни сауаттылыққа деген қызығушылығын арттырған маңызды сәттердің бірі болды.
Осындай іс-шаралардың негізгі құндылығы – жастарға бағыт-бағдар беру, оларды саналы азамат ретінде қалыптастыру. Себебі елдің ертеңі – бүгінгі жастардың білімі мен тәрбиесіне тікелей байланысты. Интеллектуалды, рухани мықты, ұлттық болмысын сақтай білетін ұрпақ – мемлекеттің тұрақтылығы мен дамуының негізгі кепілі.
Ордабасы ауданында атқарылып жатқан бұл бағыттағы жұмыстар №53 лоттың негізгі мақсатына – қоғамдағы патриоттық сезімді күшейтуге, бірлік пен тұрақтылықты сақтауға, әділдік, жауаптылық және өзара сенім құндылықтарын нығайтуға толық сәйкес келеді.
Жастардың рухани саулығы – ел қауіпсіздігінің маңызды құрамдас бөлігі. Сондықтан ақпараттық-түсіндіру кездесулерін жүйелі түрде өткізу алдағы уақытта да жалғасын тауып, өскелең ұрпақтың саналы, тұрақты көзқарасын қалыптастыруға өз үлесін қоса береді.