Ордабасы ауданында ауылдық жерлердегі кәсіпкерлікті дамыту және халықтың табысын арттыруға бағытталған «Ауыл аманаты» бағдарламасы нәтижелі іске асуда. Бағдарлама ауыл тұрғындарына шағын және орта бизнес бастауға, ауыл шаруашылығы өнімін көбейтуге және өз кәсібін дамытуға нақты мүмкіндік береді.
Мысалы, 2023 жылы бағдарлама аясында Ұялыжар ауылының тұрғыны, жеке кәсіпкер Есболова Фарида жылқы шаруашылығын дамыту мақсатында 7 200 000 теңге несие алған. Есболова несие қаражатын тиімді пайдаланып, мал басын көбейту бойынша нақты нәтижелерге қол жеткізді. Қазіргі таңда оның қожалығында 12 бас жылқы бар, оның ішінде 11 аналық және 1 құлын.
Жем-шөп қоры толықтай кәсіпкердің өз қаражаты есебінен дайындалған, малдың қыс айына дайындығы уақтылы жүргізілген. Осылайша, жеке кәсіпкердің жылдық табысы 1 500 000 теңгені құрап отыр. Мұндай нақты мысалдар бағдарлама аясында қаржылай қолдау алған басқа азаматтарға да үлгі болып, ауылдық кәсіпкерлікті ынталандыруда.
Бағдарламаның көмегі арқасында ауылдағы кәсіпкерлік белсенділік артып, жергілікті экономиканың дамуына оң әсер етілуі байқалады. Есболова Фарида өз ісін әрі қарай кеңейту жоспарын жасап отыр: алдағы уақытта жылқы басын көбейту және мал өнімін өңдеуді дамытуға бағытталған жобаларды жүзеге асыруды жоспарлап отыр.
Ордабасы ауданы бойынша «Ауыл аманаты» бағдарламасы тек жеке кәсіпкерлерге ғана емес, жалпы ауыл тұрғындарына ауыл шаруашылығы саласында тұрақты табыс табуға және кәсібін кеңейтуге мүмкіндік беретін тиімді құрал болып отыр. 2023–2024 жылдары бағдарламаның нәтижесінде көптеген азаматтар қаржылай қолдау алып, мал шаруашылығы мен өсімдік шаруашылығын дамыту арқылы аудан экономикасына қосымша үлес қосты.
Мәселен, 2024 жылы бағдарламаның қаражаты арқылы аудан тұрғындары мал шаруашылығына, егін шаруашылығына және ауыл шаруашылығы техникасына қаржы жұмсады. Сондай-ақ, ауылдық жерде бірнеше өндірістік кооператив құрылып, жеке шаруашылықтар бірігіп жұмыс істей бастады. Бұл – ауыл тұрғындарының кәсібін кеңейтуге және өнімін нарыққа шығару мүмкіндіктерін арттыруға жол ашты.
Ордабасы ауданының ауыл шаруашылығын дамытудағы осындай қадамдар – ауыл тұрғындарына жаңа мүмкіндіктер туғызумен қатар, өңірдің агроөнеркәсіптік әлеуетін арттыруға, ауылдағы тұрақты табыс пен молшылыққа жетелеуде. «Ауыл аманаты» бағдарламасы арқылы кәсіпкерлер мен шаруа қожалықтары өз кәсібін дамытуға қажетті қолдауға ие болып, аудан экономикасының тұрақты өсуіне үлес қосуда.