Арыс қаласында жастардың белсенділігін арттыру, спорттық мәдениетті дамыту және жас буынның әлеуетін қолдау мақсатында «JAS DRIVE – Жастар қарқыны» атты спорттық жастар фестивалі ұйымдастырылды. Ауқымды шараға қала әкімі Қайсар Маңқараев арнайы қатысып, спорт пен білім, мәдениет пен өнер салаларында жетістікке жеткен жас өрендермен жүздесті.
Фестиваль Қалалық Ішкі саясат бөліміне қарасты «Жастар ресурстық орталығы» КММ-нің ұйымдастыруымен өтті. Қатысушылар қатарында қаламыздың әр салада өзіндік қолтаңба қалыптастырып үлгерген жас чемпиондар, білім озаттары, шығармашыл жастар және белсенді еріктілер болды. Шараның негізгі мақсаты – жастардың өз идеяларын жүзеге асыруға мүмкіндік беру, оларды қоғамдық өмірге тарту және дене шынықтыру мен спортқа деген қызығушылықты арттыру.
Фестиваль Қалалық спорт кешенінде өтіп, түрлі бағыттағы локациялар бір мезетте таныстырылды. Шахматтан жүлде иеленген оқушылар партия көрсетсе, қол күресші спортшылар техникаларын түсіндірді. Гір көтеру, үстел теннисі мен садақ ату бағытындағы өрендер өз шеберліктерін паш етті. «Жас сарбаз» мүшелері әскери дайындық элементтерін көрсетті, ал пәндік олимпиада жүлдегерлері ғылыми жобалары мен жетістіктерін қатысушыларға таныстырды. Осы іс-шара барысында әрбір қатысушы өз қабілеті мен мүмкіндігін көрсетуге мүмкіндік алды.
Фестивальдің маңызды бөлігі – «Әкім + Жастар» атты ашық форматтағы еркін диалог алаңы болды. Жастар қала өміріне қатысты өздерін толғандырған сұрақтарын қойып, жаңа жобалары мен идеяларын ортаға салды. Қала басшысы әрбір ұсынысқа жеке тоқталып, жастар бастамаларын қолдауға дайын екенін атап өтті. Бұл бөлім қатысушыларға қоғам өмірінде белсенді болуға, қоғамдық мәселелерге араласуға ынталандыратын ерекше алаң болды.
Сонымен қатар, фестиваль барысында жастарға арналған мастер-кластар өткізілді. Арнайы шақырылған тренерлер спорттық жаттығулардың техникасын көрсетті, шығармашылық топтар түрлі өнер түрлерімен бөлісті. Өнер шеберлері би, вокал және қолөнер бойынша шеберлік сабақтарын жүргізді. Бұл шара жастардың тек физикалық дамуына ғана емес, шығармашылық қабілеттерін жетілдіруге де бағытталды.
Іс-шара бейресми форматтағы фуршетпен жалғасын тапты. Қатысушылар әкіммен еркін әңгімелесіп, ортақ мәселелерді талқылап, болашақ жоспарларымен бөлісті. Бұл кезеңде жастар бір-бірімен танысып, өзара тәжірибе алмасу мүмкіндігіне ие болды. Фестиваль соңында шараға белсене қатысқан жастарға алғыс хаттар мен арнайы сыйлықтар табысталды.
Қала әкімі Қайсар Зәкірұлы өз сөзінде жастардың қоғам өміріндегі орны ерекше екенін айта келе, олардың алдағы жетістіктерге жетуіне үлкен сенім білдірді. Сонымен қатар, қалада жасөспірімдерге арналған қосымша спорт алаңдарын, мәдениет үйін, кітапханалар мен жас ғалымдарға арналған орталықтарды ашу жоспары туралы айтты. Бұл – жас ұрпаққа білім мен шығармашылықты қатар дамытуға жағдай жасау мақсатындағы жүйелі саясаттың бір бөлігі.
Фестивальге қатысқан жас чемпиондар мен шығармашылық топтардың пікірлеріне сүйенсек, мұндай шаралар олардың өзіндік қабілеттерін көрсетуге, жаңа достар табуға және өз-өзін дамытуға үлкен мүмкіндік беретінін айтты. Көпшілігі алдағы уақытта да осындай іс-шараларға қатысып, спорт пен ғылым саласында жетістікке жетуді жоспарлап отыр.
Фестивальдің басты жетістігі – жастардың белсенділігін арттыру, олардың спортқа, ғылымға, өнерге деген қызығушылығын ояту және болашаққа сенімін арттыру. «JAS DRIVE – Жастар қарқыны» фестивалі қаламызда жастардың әлеуетін дамытуға арналған тұрақты алаңға айналып, әр қатысушыға жаңа идеялар мен мотивация беретінін дәлелдеді.
Шараның қорытындысында қала әкімі Қайсар Маңқараев жастарды еліміздің дамуына үлес қосуға шақырып, олардың шығармашылық және спорттық жетістіктерін қолдауға әрдайым дайын екенін атап өтті. Сонымен қатар, фестиваль барысында жинақталған тәжірибе келесі жылдарда да жас буынға бағытталған іс-шараларды ұйымдастыруда қолданылмақ.