Елордада Қазақстан Республикасының Оқу-ағарту министрлігінің қолдауымен жетім балалар мен ата-анасының қамқорлығынсыз қалған балаларды қолдауға бағытталған «Жұлдыз болғым келеді» республикалық вокалдық байқауының жеңімпаздарын салтанатты марапаттау рәсімі өтті. Алғаш рет ұйымдастырылған бұл байқау әлеуметтік тұрғыдан осал санаттағы балалардың шығармашылық қабілетін дамытуға, олардың бойындағы сенімді нығайтып, үлкен өмірге жол ашуға бағытталған маңызды мәдени жоба болды.
Аталған республикалық өнер додасында Түркістан облысының намысын қорғаған арысқалалық оқушы зор жетістікке қол жеткізді. Түркістан облысы білім басқармасына қарасты «Т.Тәжібаев атындағы отбасылық үлгідегі балалар ауылы» коммуналдық мемлекеттік мекемесінің тәрбиеленушісі, Арыс қаласындағы Достық мектебінің 11-сынып оқушысы Өскенбаев Ерасыл Әмірұлы 42 үміткердің арасынан суырылып шығып, «Жоғары санаттағы Соло» номинациясы бойынша Гран при иегері атанды. Байқау қорытындысы бойынша жас өнерпазға халықаралық деңгейде тәжірибе жинақтауға мүмкіндік беретін Дубай қаласына жолдама табысталды.
Бұл байқау көптеген қатысушылар үшін үлкен сахнадағы алғашқы қадам, елордаға жасалған алғашқы сапар, өз арманын жүзеге асыру жолындағы маңызды белеске айналды. Әсіресе ата-ана қамқорлығынсыз қалған балалар үшін мұндай жобалардың рухани және әлеуметтік маңызы зор. Өнер арқылы өзін көрсету, көпшілік алдында еркін сөйлеу, сахна мәдениетін меңгеру олардың өмірге деген көзқарасын қалыптастырып, өз күшіне сенуіне ықпал етеді.
Шара барысында ҚР Оқу-ағарту министрлігі Балалардың құқықтарын қорғау комитетінің төрағасы Насымжан Оспанова сөз сөйлеп, мемлекет тарапынан балаларды қолдауға бағытталған бастамалар жүйелі түрде жалғасын табатынын атап өтті. Оның айтуынша, әрбір баланың қабілетін ашу, олардың шығармашылық әлеуетін дамыту – ел болашағына жасалған маңызды қадам. Осындай жобалар арқылы қоғамда сенім, әділдік пен қамқорлық қағидаттары нығая түседі.
Өскенбаев Ерасылдың бұл жетістігі – тек жеке жеңіс қана емес, сонымен қатар Түркістан облысындағы білім беру мен тәрбиелеу жүйесінің нәтижесі. Ол өнерге деген қызығушылығын ерте жастан байқатып, ән айтуға ерекше ынта қойған. Сахна мәдениетін, вокалдық мүмкіндігін және орындаушылық шеберлігін үздіксіз жетілдіріп келеді. Әртүрлі шығармашылық байқаулар мен мектепішілік, қалалық, аудандық іс-шараларда белсенділік танытып, бірнеше мәрте жүлделі орындарға ие болған.
Жас өнерпаздың бойындағы еңбекқорлық пен жауапкершілік оның шығармашылық жолындағы басты тірегіне айналған. Ол әрбір байқауға тыңғылықты дайындалып, өзіне жүктелген міндетке салмақпен қарайды. Мұндай қасиеттер жас ұрпақтың тұлға ретінде қалыптасуында ерекше мәнге ие. Ерасылдың жетістігі өзге оқушыларға да мотивация беріп, өнерге, білімге және өзін-өзі дамытуға деген қызығушылығын арттырады.
Республикалық деңгейде ұйымдастырылған бұл байқау балалардың қоғамға бейімделуіне, өз орнын табуына, шығармашылық арқылы өзін танытуына жол ашты. Сонымен қатар, мұндай бастамалар қоғамда бірлік пен ынтымақты, жанашырлық пен жауапкершілікті нығайтуға ықпал етеді. Мемлекеттік қолдаудың арқасында жүзеге асқан жоба әр баланың қабілетін дамытуға тең мүмкіндік бар екенін айқын көрсетті.
Түркістан облысының жас талантының елорда төрінде топ жарып, жеңімпаз атануы өңір абыройын асқақтатты. Бұл жетістік өңір жастарының әлеуеті жоғары екенін, оларға дұрыс бағыт-бағдар мен қолдау көрсетілген жағдайда үлкен белестерді бағындыра алатынын дәлелдейді. Осындай жетістіктер арқылы жас ұрпақ елге деген сенімін арттырып, өз болашағын Қазақстанмен байланыстыруға ынталанады.