Түркістанда Шардара ауданының мәдени күндері өз мәресіне жетті. «Өнерлі өлке» облыстық өнер фестивалі аясында ұйымдастырылған іс-шара қатарынан екі күн бойы қала тұрғындары мен қонақтарына көтеріңкі көңіл-күй сыйлады. «Керуен сарай» туристік кешенінде аудан өнерпаздарының қатысуымен өткен гала-концертке аудан әкімінің орынбасары Бауыржан Шомпиев арнайы қатысып, келген көрерменге алғысын білдірді.
Мерекелік концерт Шардара тарихын суреттейтін қойылыммен басталып, ән-күймен жалғасты. Кештің арнайы қонағы шардаралық Сырымбет Бибосынов өнер көрсетіп, кеш белсенділеріне сыйлықтар ұсынды.
Шараның алғашқы күні Этноауыл аумағында салт-дәстүр мен әдет-ғұрып көріністері көрсетілді. Ұлттық тағам түрлері таныстырылды. Шардара ауданының жетістіктері туралы кітап және фото көрмелері, суретшілер мен қолөнер шеберлерінің көрмесі жасақталып, ауыл шаруашылығы өнімдерінің жәрмеңкесі өтті. Сонымен қатар, жастардың танымдық қабілетін арттыруға, интеллектуалды, еркін ойлай алатын жеке тұлға етіп тәрбиелеу мақсатында «Ой мен ойын» интеллектуалды сайысы өтті.
Келесі күні ұлттық спорттық ойын түрлерінен, атап айтсақ, қошқар көтеру, алыптар сайысы, асық ату, ләңгі тебу, садақ ату, қазақ күресі сынды түрлі т.б ойындардан жарыстар өткізілді. Ойын жеңімпаздарына сыйлықтар берілді.
Айта кетейік, фестиваль мақсаты – ұлттық мәдениет пен өнерімізді дамыту, Түркістанның туристік әлеуетін дамыту болып саналады.
Түркістан облысы әкімінің баспасөз қызметі