Шымкент қаласындағы жоғары оқу орындарында орналасқан сайлау учаскелерінде қала тұрғындары дауыс беріп жатыр.
М.Әуезов атындағы ОҚУ-да №101 сайлау учаскесі таңғы 7.00- ден жұмыс істеп тұр. Мұнда 1588 сайлаушы тіркелген. Ең бірінші болып 39 жастағы қала тұрғыны Мұрат Төлебеков өз таңдауын жасады.
Сондай-ақ, Оңтүстік Қазақстан мемлекеттік педагогикалық университетіндегі № 98 сайлау учаскесінде дауыс беру жүріп жатыр. Онда 2100 дауыс беруші тіркелсе, оның ішінде алғаш болып Ержан Төлеев сайлау учаскесіне келді.
Шаhарда ҚР Парламенті мәжілісі және мәслихаттар депутаттарының кезектен тыс сайлауына қала тұрғындары белсенді қатысуда.
Сондай-ақ, Шымкенттегі 6698 әскери бөлімінде орналасқан №30 сайлау учаскесі ҚР Парламенті мәжілісі және мәслихаттар депутаттарының кезектен тыс сайлауында белсенділік танытып отыр. Сарбаздар сайлауға таңғы сағат 6.00-ден бастап келіп жатыр.
— Сайлау — еліміздегі маңызы зор саяси науқан. Ал, сайлауда белсенділік таныту — әрбіріміздің азаматтық парызымыз. Себебі, біз өз таңдауымызды жасай отырып, Жаңа Қазақстанның жаңа қоғамын қалыптастырамыз. Еліміздің өркендеуіне тың серпін әкелетін бағдарламаны қолдаймыз. Біздің 6698 әскери бөлімінде 200-ден астам сарбаз дауыс беруге қатысады. Біз Шымкент қалалық аумақтық сайлау комиссиясына алдын ала өтініш білдірдік. Жабық сайлау учаскесі ретінде мұнда тек сарбаздар ғана дауыс береді, — дейді №30 сайлау учаскесі комиссиясының төрағасы, 6698 әскери бөлімі командирінің орынбасары, подполковник Руслан Бектұрсынов.
6698 әскери бөлімде Отан алдындағы борышын өтеп жүрген қатардағы жауынгер қарағандылық Давид Великанов өз таңдауын жасады.
—Мен Қазақстанның патриоты ретінде өз таңдауымды жасадым. Еліміздің келешегі жарқын болуы үшін әрбіріміздің даусымыз маңызды. Мен барша замандастарымды сайлауда белсенділік танытуға шақырамын, — дейді ол.
Айта кетейік, 6698 әскери бөлімі белсенділік танытып, алғашқылардың қатарынан табылған 4 сарбазға арнайы сыйлық үлестірді. Бір сағат ішінде 102 сарбаз дауыс беріп үлгерді.
