Тұрмыстық зорлық-зомбылық — қоғамда жиі талқыға түсетін өзекті тақырыптардың бірі. Осы мәселеге қатысты Ішкі істер органдарының қызметкерлері түрлі профилактикалық жобалар ұйымдастырып, іс-шараларды қарқынды өткізіп келеді.
Осы ретте Еңбекші АПБ Әйелдерді зорлық-зомбылықтан қорғау тобының инспекторлары Ж.Тасқұлова мен А.Төребай «Жастар» және «Дағдарыс» орталықтарының қызметкерімен бірлесіп, арнайы флеш-моб өткізді.
Мұндағы басты мақсат — отбасындағы ұрыс-керіс пен түрлі жанжалдарға жасөспірімдердің қарсы екендігін жеткізу.
«Нәзікжандылардың лайықты өмір сүруі үшін қолайлы жағдай жасау, құқықтық сауаттылықтарын арттыру, бұл бағытта ақпараттық-түсіндіру жұмыстарын жүргізу де — осы акция аясында жүзеге асады. Өкінішке қарай, бүгінде әйелдерге қатысты зәбір көрсету әлемнің барлық аймағында таралған және кез келген қоғамда кездесетін жағдай болып отыр. Сол себепті аталған өзекті жайт туралы тек акция аясында ғана емес, күнделікті өмірде де айтылып, алдын алу керек деп ойлаймын», — деді полиция капитаны Ж.Тасқұлова.
Осы тұста тәртіп сақшылары отбасындағы жанжал салдарынан балалардың көп зардап шегетінін атап өтті. Сондай-ақ, оларға қатысты күш көрсету, кемсіту, ұрып-соғу жайттары бойынша заң жүзінде жауапкершілік қарастырылғанын ескертті.
Айта өтетін ақпарат, республика көлемінде қолға алынған «Зорлық-зомбылықсыз 16 күн» іс-шарасы 10-желтоқсанға дейін жалғасады.
Осы ретте, тәртіп сақшылары тұрғындарға жақын туысыңыз немесе өзіңіз тұрмыстық зорлық-зомбылыққа ұшыраған жағдайда, мемлекет тарапынан бірқатар маңызды көмек түрін тегін ала алатыныңызды еске салады.
Президент жолдауында айтып өткендей «Отбасылық зорлық-зомбылықты қылмыс санатына жатқызу мәселесі қоғамда көптен бері талқыланып жүр. Құқық қорғау органдары бұл ұсыныстың дұрыс екеніне күмәнмен қарайды. Себебі, мұндай тұрмыстық жағдайларды анықтау оңай емес, яғни осындай оқиғаларды тергеп-тексеру қиынға соғады. Бұл сөздің де жаны бар. Бірақ, қалай десек те, отбасылық зорлық-зомбылыққа көз жұма қарауға болмайды.»
«Жыныстық зорлық-зомбылық, педофилия, есірткі тарату, адам саудасы, әйелдерге қатысты тұрмыстық зорлық-зомбылық және басқа да ауыр қылмыстарға, әсіресе, балаларға қатысты қылмыстарға қолданылатын жазаны шұғыл түрде қатайту қажет. Бұл мәселені шешуді Парламентке және Үкіметке тапсырамын» деген мемлекет басшысының жолдаудағы тақырыптар төңірегінде студенттерге толыққанды насихатталып, өзара сұрақ-жауап алмасты.
